上海鲁班庙的前尘往事
作者：薛理勇
沪语改写：丁迪蒙
诵读：郭莉
点击下方收听音频。
鲁班，双姓公输，名般，战国时鲁国人，“般”“班”同音，后首来大家就叫伊鲁班。据说伊首创了攻城个云梯搭磨粉个硙，又发明搭仔改进了交关木作个工具，因此，伊拨公认为中国水木作业个祖师爷。
日常生活当中离勿开水木作业，水木作业也是各行各业当中占有人数最大个队伍之一，所以，中国个交关城镇侪有鲁班庙，有个地方还有几只。据笔者所知，近代以后上海至少有五六处。
一、里虹口桥鲁班庙虹口港是黄浦江支流。近代以后，虹口成为“虹口美租界”。虹口市政发展搭人口增长，现在大名路桥以南个叫“外虹口”，长治路桥以南叫“中虹口”，“汉阳路桥”以南叫“里虹口”，余杭路桥以南叫“新虹口”，以北大以西叫“西虹口”直到现在，当地人仍旧习惯搿能叫。
里虹口个鲁班庙原来是广东红木作木匠个同业议事团体。近代以前，广州是中国惟一对外开放个港口城市，外国船到广州，进港以后要修理，于是，广州就有一支庞大个修理队伍。后来，外贸中心转移上海，广东西洋船修理工也到上海来，工作搭居住勒码头集中个虹口一带。咸丰年间就勒“里虹口”建鲁班庙。19世纪50年代以后，火轮船逐渐替代木帆船，广东帮船舶修造业衰落，搿只庙开始衰落。
二、梧州路鲁班庙
梧州路鲁班庙原址是东余杭路245号，庙门朝南。1928年发生重大火灾，梧州路至商丘路个东余杭路段烧成废墟，庙离火灾现场比较远幸存下来。勿久拿庙门开勒交通方便个梧州路94号。搿只庙也叫做“公输子庙”，建造年代勿详，1909年出版《上海指南》当中有庙个记录。
搿只庙是浙江宁波轮船木业公所建，公所还可、勒庙个北面建立“上海浙宁轮船木业子弟小学”。后改名“劳动小学”，又改名“梧州路第一小学”，庙产也侪归学堂使用。进门是只大天井，再进去是正殿，供鲁班，两厢陈放十八般兵器及木工工具模型。“文革”辰光小学撤脱，改北虹中学校办工厂，1992年拆除。
三、硝皮弄鲁班殿
上海县城以前也有鲁班殿。鸦片战争以后，政建设步伐加快，上海本地搭南汇县本帮水木作队伍发展也快，伊拉也建立同业议事机构，并集资建造供祖师爷鲁班殿。搿个就成为以本帮为主体个水木业同业公所。
随牢仔上海经济地位上升，以宁波、绍兴搭仔苏州来上海个水木业队伍也逐渐壮大，伊拉勿甘心受制于本帮同行，就群起攻之，要求改组原来个水木业公所。各帮争斗不休，终于勒同治七年由上海知县出面调停，并由上海县政府派官匠朱炳石作为鲁班殿主持，上海搭宁绍帮、苏州洞庭山帮轮流主持工作，订立同行操业搭收费标准。
上海人侪晓得杨斯盛是近代上海水木业个领袖。伊是川沙青墩人。13岁到上海来做泥水木匠，刻苦耐劳，聪明好学，名声鹊起，地位逐渐上升。
1891年，外滩江海北关建筑拆脱重建，聘外国工程师设计。搿是幢纯西洋式建筑，工艺要求高，上海交关营造商勿敢招标承建，杨斯盛前头承建过好几幢西洋建筑，伊投标中标。杨斯盛勿仅按时、保质完成营建，还多次指出图纸里向个错误及勿合理方，伊个坦率、智慧受到大家个赞赏。从此，伊个名气搭地位节节上升，拨公认为是上海营造业之首。
1907年，杨斯盛经过细致调查搭耐心工作，终于说服了绍兴帮同行，并勒鲁班殿成立“沪绍水木业公所”。搿个殿勒城内硝皮路弄95号，搭“上邑洋广衣业轩辕殿”相邻，60年代拨拆脱，翻建为五层公房。
四、山东会馆鲁班庙
今朝个卢家湾也有一条“鲁班路”。搿搭以前是否也有过鲁班庙呢？老上海侪晓得，搭鲁班路相通个重庆南路浪租界时期叫“吕班路”，“吕班”、“鲁班”，一字之差，读音相近，伊拉之间有啥关系伐？
先来介绍上海个山东会馆。山东会馆名义浪是山东省同乡勒上海设立个会馆，实际浪是山东沿海城市以及济南等地个商人勒上海建立个同乡人团体。山东滨海，清初已经有商人通过海浪航运进入上海，伊拉拿山东以及辽东个大豆、花生、食油、豆饼运到上海，再拿上海个棉花、棉布、粮食运到北方去。由于食油、豆饼勒上海销路邪气好，所以山东来上海个商人越来越多。据记载，清顺治初年，勒上海个山东搭仔关东两帮就集资购买了上海县城西面个土地50多亩，建立“关山东公所义冢”，安置死勒上海个同乡人。据目前所晓得个资料来看，搿是外帮商人团体勒上海设立个第一个义冢。由于关山东商人经营个货物品种基本一致，而同业当中已经有同业公所存在，所以关山东公所个存在属多余了。大约摸勒道光年间，关山东公所个义冢事实浪就荒废了。
关山东商人除脱开展搭上海个埠际贸易之外，因位山东地方靠近朝鲜半岛，所以，山东搭朝鲜个贸易数量最大。1894年中日爆发甲午战争，战争以大清战败而告结束，中国对朝鲜个控制权拨日本政府夺脱。搿能一来，原来主要经营对朝鲜海上贸易个山东商人侪转向上海，使得进入上海个山东籍商人数量暴增，旅居上海个山东人迫切希望有一个自家个会馆来保护商业利益。1901年，山东东莱人吕海寰从海外访问回来，又奉命以商务大臣个头衔蹲勒上海。而山东历城人汪懋琨当时刚好担任上海知县，于是，两家头合议，联合上海个山东商人组织山东会馆。
前头讲过，关山东公所勒上海城西有50余亩地个，长期没人管理，已经是一片荒芜，勿少地块拨居民占用了。于是，汪懋琨派人到实地调查，发现界石还勒海，就动用政府力量下命令，伊面个居民限期迁出。从1903年4月破土动工，到1906年冬竣工，历时两年半，耗资数百万。山东会馆可以讲是上海县城周边地区占地面积最大个会馆了。
宣统三年，上海个宁波帮水木作业决心搭沪绍水木业公所分道扬镳个辰光，决定租借山东会馆个部分空地造会馆。宁波帮水木业公所还造了只鲁班庙，鲁班本来就是山东人，也是山东人个祖先神，于是水木业个祖师爷搭山东人个老祖宗不谋而合，所以山东会馆也拨叫作“鲁班庙”。
1914年上海法租界扩张成功，山东会馆个全部面积划进法租界。以后，法租界开始大规模市政工程，山东会馆占地邪气大，于是，会馆个部分土地拨征用筑成马路，会馆也拨道路分成几块。其中个吕班路是以1893年法国驻上海总领事吕班命名个，伊也是穿越山东会馆个主要马路。
原来勒勒“打铁浜”个鲁班庙也被迫拆脱了，原址勒勒现在个太仓路、重庆中路附近，据讲鲁班庙就迁到了鲁班路，鲁班路就是由此而得名个。另外一块地产拨教会买下来造了仁爱医院，也就是现在卢湾区中心医院个地址，不过，一直到解放初期，山东会馆还勒现在个自忠路、重庆南路东保存一块地产，作为会馆搭会馆办个齐鲁中小学个用地。
我以前工作个单位有位老师傅，山东人，住勒鲁班路，伊讲，鲁班路一带有交关山东人，山东人卖拳头，一到夜里，搿搭个“掼跤”形成了风气。还有一种说法，鲁班路向南到底就是江南造船厂，厂里向木工多，于是，搿搭也有鲁班庙，鲁班路是以搿个鲁班庙而得名个。可能搿只鲁班庙忒小，我呒没寻到相关资料，有待考证伐。
（本文作者）
（本文朗读者）来源：“吳越小豬”公众号
上海老底子
每天为侬送上精彩文章一组
打开尘封的记忆，寻觅往昔的岁月
叙上海老底子事
忆上海老底子人
诉上海老底子情
以史明志，以启未来
原标题：《上海鲁班庙的前尘往事（上海话朗读）》